Parmulaan ni tingki / legenda terjadinya waktu

(magihuthon parbinotoan ni halak Batak di tingki najolo)
Di mulana holan laut na manahatang (laut marsada) dope na adong. Marhite huaso ni Debata Mula Jadi Na Bolon mardabu ma sada parbue ni hau ara Sundung tu laut i di tingki manogot ( hatiha i ma digoar Komis) gabe tubu ma sada hau. Di pangului ( na ginoar Bisnu, hira hira pukul 10) marbulung ma hau i. Di hos ni ari (na ginoar Sori, ima pukul 12) marbunga ma hau i. Di guling ari (na ginoar Hala, hira hira pukul 3) marparbue ma. Disi bot ari (na ginoar Borma, ima pukul 6) madabu ma sada parbuena jala laos mate ma hau i.alai marsogot nai tubu ma muse sian parbue na madabu i sada hau, jala marbulung di pangului mabunga dihos ari,jala mate di bot ni ari dung jolo madabu sada parbuena tu laut i,jala sai songon i ma torus mandatdati saha ro di ujung ni portibion, ninna nasida.

Ia hau nasai mandatdati tubu i margoar ma i muse Hariara Sundung ni Langit. Lima do uratna, ima na gabe ‘parmamisan holing hatiha silimalima, jala ima mulani ‘hatiha silimalima’, na niulahon ni pangatiha.
Ia badan ni hau i , ima na gabe taon bolon; parmulaon ni taon. Mardangka do haui 8, i ma parmulaan ni desa na 8 ( Utara, Irisanna, Purba, Anggoni, Dangsina, Nariti, Pastima, Manabia).
Marranting do hau i 30, ima parmulaan ni ari na 30 i (ida angka goarna di ‘Parhalaan ‘).
12 do parbue ni hau i na gabe parmulaan ni bulan na 12 i. Laos ima parmulaan ni parmesa na 12 i (Zodiac) .
Angka on ma goar ni parmesa na 12 ; Mesa (Gemini), Marsoba(Taurus), Nituna( Aries), Harahata( Cancer), Singa (Leo), hania ( Virgo), Tola (Libra), Mortiha( Scorpio), Dano( Sagitarius), Morhara( Capriconus), Marhumba( Aquarius), dohot Mena( Pisces).
Adong do dua dalan dipangke angka datu laho manontuhon ari dohot tingki na uli patupahon siulaon,i ma ;
I. maningkir parpeak ni Pane Na Bolon
II. manjaha Parhalaan.

lihat tabel dibawah :



catatan : ini adalah kepercayaan batak jaman dahulu,yang mengatakan sesuatu hari itu baik atau buruk. tetapi sekarang, kita sudah percaya akan Dia, Allah yang menciptakan hari. jadi, semua hari itu indah, apalagi kita mensyukurinya dan memuji Dia yang Empunya hari

dari berbagai suku yang pernah saya selidiki di asia pasifik suku batak adalah salah satu yang terindah...(Van Breqment,peneliti)